वि.सं.२०८१ साउन ९ बुधवार

एनआईसी एशिया बैंकमा कार्यरत कर्मचारी मृत भेटिए, आफन्तद्वारा बैंक तोडफोड

एनआईसी एशिया बैंकको बझाङ चैनपुर शाखामा कार्यरत एक कर्मचारी मृत भेटिएका छन् ।

जयपृथ्वी नगरपालिका ११ का रोहित थापा बुधबार केदारस्युँ गाउँपालिकाको चौडाम नजिकै रहेको सेती नदीमा मृत अवस्थामा फेला परेका हुन् ।

थापा मृत अवस्थामा फेला परेपछि उनका आफन्तले बैंकमा तोडफोड गरेका छन ।

मृतकका आफन्तले बिहिबार साँझ ६ बजे सदरमुकाम चैनपुरमा रहेको एनआईसीको शाखा कार्यालय तोडफोड गरेका हुन् ।

आफ्नो कार्यालयमा कार्यरत कर्मचारी बेपत्ता भएको हप्ता दिन बितिसक्दा पनि घरपरिवारलाई जानकारी नदिएको र खोजतलासी नगरेको भन्दै बैंकमा ढुंगामुडा गर्न बाध्य भएको मृतकका आफन्तले बताए ।

मृतक थापा भदौ ३ गते साँझ ६ बजेपछी कार्यालयबाट बिदा भएपछी भोली पल्ट कार्यालयको सम्पर्कमा आएका थिएनन् ।

थापा करिब ३ बर्ष देखि एनआईसी एशिया बैंकमा सुरक्षा गार्डको रुपमा कार्यरत रहेको आफन्तले जानकारी दिएका छन् ।

मृतक थापाका आफन्तले कार्यालयमा तोडफोड गरेपछि नेपाल प्रहरी र शसस्त्र प्रहरीले बैंकमा सुरक्षा दिइएको छ ।

मृतक थापाका आफन्तले शब बुझ्न मानेका छैनन् ।

शव पोष्टमार्टमका लागि जिल्ला अस्पताल सिमखेतमा राखिएको र घटनाको थप अनुसन्धान भइरहेको जिल्ला प्रहरी कार्यालय बझाङका डिएसपी जागेश्वर भण्डारीले बताए ।

साथै बैंकलाई सुरक्षाको घेरामा राखेर सेवा सञ्चालन गरिने डिएसपी भण्डारीले बताए ।