प्रतिनिधिसभा निर्वाचनअन्तर्गत गुल्मी निर्वाचन क्षेत्र नम्बर २ मा मतदाता प्रभावित पार्न रकम वितरण गरिएको भन्ने आरोप सार्वजनिक भएको छ।
गुल्मी–२ बाट उम्मेदवार रहेका गोकर्ण विष्ट पक्षबाट मदाने गाउँपालिका–५ मा रकम बाँडिएको भन्ने गोप्य सूचना प्राप्त भएको हो। उक्त आरोपअनुसार एमालेबाट निर्वाचित वडाध्यक्ष हिमाल खड्कामार्फत गाउँका केही युवा तथा ज्येष्ठ नागरिकलाई नगद रकम वितरण गर्दै ‘सूर्य’ चिन्हमा मतदान गर्न आग्रह गरिएको दाबी गरिएको छ।
सामाजिक सञ्जालमा भाइरल भएको एक भिडियोमा एक व्यक्तिले आफूले एक हजार रुपैयाँ पाएको र खर्च गरिसकेको उल्लेख गरेको दृश्य देखिन्छ। यद्यपि भिडियोको प्रामाणिकता स्वतन्त्र रूपमा पुष्टि भइसकेको छैन।
घटनाबारे जिल्ला प्रशासन तथा सुरक्षा निकायले चासो व्यक्त गरेका छन्। निर्वाचन आयोग गुल्मी र प्रहरी प्रशासनले उक्त विषयमा प्रारम्भिक अनुसन्धान सुरु गरिएको जानकारी दिएका छन्। यदि आरोप प्रमाणित भएमा प्रचलित निर्वाचन ऐनअनुसार कडा कारबाही गरिने बताइएको छ।
निर्वाचन आचारसंहिता विपरीत मतदातालाई आर्थिक प्रलोभन दिनु गम्भीर अपराध मानिन्छ। यस प्रकारका गतिविधिले स्वतन्त्र, निष्पक्ष र भयरहित निर्वाचन प्रक्रियामाथि प्रश्न उठ्ने भएकाले सरोकारवाला निकायहरू सजग हुनुपर्ने देखिन्छ।
https://www.facebook.com/share/v/187s2FRkyJ/
