वि.सं.२०८१ साउन ९ बुधवार

महिला प्रहरी बलात्कार प्रकरण : आरोपी इन्स्पेक्टर छुटाउन कांग्रेस नेताहरुसहित बालुवाटारबाट दबाब

महिला प्रहरीमाथि जबरजस्ती करणी प्रयास आरोपमा प्रहरी नियन्त्रणमा रहेका धादिङको इलाका प्रहरी कार्यालय खानीखोलाका प्रहरी निरीक्षकलाई छुटाउन कांग्रेस नेताहरूको  दबाब सुरु भएको छ ।
सत्ता र शक्तिको आडमा गत वर्ष मंसिर ४ गते खोलानाला पुगेका प्रहरी निरीक्षक अपूर्व ढुंगानालाई छुटाउन कांग्रेस नेता तथा सार्वजनिक लेखा समितिका पूर्व सभापति भरतकुमार शाहसहित नेपाली कांग्रेसका नेताहरूले प्रहरी प्रधान कार्यालयमार्फत दबाब दिन थालेका छन् ।

स्राेतका अनुसार ढुंगानालाई मिलाएर मुद्दा चलाउन र सहज बनाउन दबाब दिँदै शाह लगायत बालुवाटारबाट समेत पटक पटक फोन आउने गरेको छ ।

धादिङका प्रहरी उपरीक्षक राकेश सिंहले फोनबाट आउने दबाबका कारण काम गर्नै नसक्ने अवस्थामा पुगेको गुनासो गर्न थालेको प्रहरी अधिकृतहरू बताउँछन् ।

ढुंगाना सार्वजनिक लेखा समितिका पूर्व सभापति भरतकुमार शाहकी श्रीमती कांग्रेस रुपन्देहीकी उपसभापति अनिता ढुंगाना शाहका सहोदर भाइ हुन् । नेता शाह प्रधानमन्त्री एवं पार्टी सभापति शेरबहादुर देउवा निकटस्थ हुन् ।

लमजुङको सुन्दरबजार नगरपालिका घर भई काठमाडौँ बसोबास गर्दै आएका ढुंगाना कांग्रेस वरिष्ठ नेता रामचन्द्र पौडेलका नजिकका आफन्त समेत भएकोले प्रहरीमा पटक पटक आकर्षक पोष्टिङ पाउँदै आएका छन् । उनलाई सहज हुने वातावरण बनाउन नेता पौडेलले समेत पटक पटक फोन गरेका छन् ।

धादिङका एक प्रहरी अधिकारीका अनुसार यसभन्दा अघि पनि एक जना महिला प्रहरी अधिकृतमाथि जबरजस्ती करणी प्रयत्न गरेको मौखिक उजुरी थियो तर ढुंगानाले बालुवाटारको शक्ति प्रयोग गरेर ती अधिकृतलाई सरुवा मात्रै गराएनन् यो विषय उठाए जुनसुकै बेला जे पनि हुनसक्ने भन्दै धम्की दिएका थिए।